ብኸመይ ክጠንስ እኽእል

ወርሓዊ ጽግያት፡ ምጅማር ዑደት

ኣብ ነፍሲ-ወከፍ ወርሒ ኣብ ዘለዋ ናይ ዑደትኪ መዓልቲታት ክትጠንሲ ትኽእሊ ኢኺ። ዕደትኪ ኣብታ ደም ብርሕምኺ ክፈሰላ ዝጅምር ቀዳመይቲ መዓልቲ ይጅምር። እዚ ድማ ወርሓዊ ጽግያት ተባሂሉ ይጽዋዕ።

ዑደት ጽግያትኪ ንኣስታት 28 መዓልቲታት ይጸንሕ።

• ገለ ደቂ-ኣንስትዮ ሓጺር ዑደት ክህልወን እንከሎ ገሌአን ከኣ ነዊሕ ዑደት ኣለወን።
• እቲ ዑደት ካብ 25 ክሳዕ 35 መዓልቲታት ይጸንሕ።
• ገለ ደቂ-ኣንስትዮ ዝዛብዐ ዑደት ኣለወን። ኣብ ነፍሲ-ወከፍ ወርሒ፡ ዑደት ጽግያተን ብንውሓቱ ዝተፈላለየ ይኸውን።
• ንውሓት ግዜ ናይ ጓለንስተይቲ ዑደት ጽግያት ኣብ ጉዕዞ ህይወታ ክቀያየር ይኽእል። ኣብ እዋን ጉርዝና፡ እቲ ዑደት ጽግያት ዝበዝሕ ግዜ ዘይስሩዕ ይኸውን።

ጽፍዮ-እንቋቚሖ

ኣስታት 14 መዓልታት ቅድሚ እቲ ዝቕጽል ወርሓዊ ጽግያትኪ፡ ጽፍዮ-እንቋቝሖ ይካየድ። እዚ እቲ ዋህዮ እንቋቑሖ ካብ ማህደር እንቋቑሖ ክወጽእ እንከሎ እዩ።

ድሕሪ ጽፍዮ-እንቋቑሖ፡ እቲ ዋህዮ እንቋቑሖ ብሻምቡቆ ማህጸን ኣቢሉ ናብ ማህጸን ይጓዓዝ። ድሕሪ እቲ ጽፍዮ-እንቋቑሖ ብገምጋም ካብ 4 ክሳዕ 5 መዓልቲታት ኣብ ዘሎ ግዜ፡ እቲ ዋህዮ እንቋቑሖ ኣብ ማህጸን ይበጽሕ። እቲ ማህጸን ንተኸላ ዋህዮ እንቋቑሖ ድልው ይኸውን።

ጽግየት ዋህዮ እንቋቑሖ

እቲ ዋህዮ ፈሳሲ ዘርኢ ወዲ-ተባዕታይ ነቲ ዋህዮ እንቋቑሖ እንድሕር ኣጽግዩዎ ክትጠንሲ ትኽእሊ። እዚ ምስ ወዲ-ተባዕታይ ጾታዊ-ርክብ ብምፍጻም ከጋጥም ይኽእል። ወዲ-ተባዕታይ ኣብ እዋን ጾታዊ-ርክብ ፈሳሲ ክፍንው እንከሎ፡ ዋህዮታት ፈሳሲ ዘርኢ ወዲ-ተባዕታይ ናብ ርሕምኺ ክኣትዉ ይኽእሉ። በዞም ዝስዕቡ ምኽንያታት ክትጠንሲ ትኽእሊ እንተድኣ:

• ሓደ ዋህዮ ናይ ፈሳሲ ዘርኢ ወዲ-ተባዕታይ ናብቲ ዋህዮ እንቋቑሖ ይኣቱሞ የጽግዮ፡ ከምኡድማ;
• እቲ ዝጸገየ ዋህዮ እንቋቑሖ ኣብቲ ኣብ ማህጸን ዝርከብ ዕንጓር መሰል ሽፋን ይትከልሞ ክዓቢ ይጅምር።

ሓደ ወዲ-ተባዕታይ፡ ቅድሚ ዘርኢ ምፍሳሱ፡ ዋህዮታት ናይ ዘርኢ ፈሳሲ ዘለዎ ቁሩብ ፈሳሲ ጸረር ከብል ይኽእል እዩ። ስለዚ እቲ ወዲ-ተባዕታይ ፈሳሲ ዘርኢ ወዲ-ተባዕታይ ቅድሚ ምፍናዉ መትሎኡ ካብ ርሕሚ ምውጻእ ብዙሕ ዘየተኣማምን ሜላ መከላኸሊ ጥንሲ እዩ።

እንተድኣ ጠኒስኪ፡ ወርሓዊ ጽግያትኪ የቋረጽ። ይኹን እምበር፡ ገለ ኣንስቲ ኣብ ቀዳማይ ወሪሒ ጥንሰን ቁሩብ ደም ከፍስሳ ይኽእላ እየን።

ኣብ ነፍሲ-ወከፍ ወርሒ ክትጠንስሎም እትኽእሊ ኣስታት 6 መዓልቲታት ኣለዉ። ዋህዮ እንቋቑሖ ን 1 መዓልቲ ብህይወት ክጸንሕ እንከሎ ዋህዮ ፈሳዊ ዘርኢ ወዲ-ተባዕታይ ድማ ን 5 መዓልቲ ብህይወት ይጸንሕ። ቅድሚ ጽፍዮ-እንቋቑሖ ኣብ ዘለዋ ኣስታት 5 መዓልቲታት ከምኡ ድማ ድሕሪ ጽፍዮ-እንቋቑሖ ኣብ ዘላ 1 መዓልቲ ክትጸግዪ ትኽእሊ ኢኺ። ኣብተን ዝስዕባ መዓልቲታት፡ ክሳዕ እተን ቅድሚ ዝቕጽል ጽፍዮ-እንቋቑሖኺ ዘለዋ መዓልቲታት፡ ጸጋይት ኣይኮንክን። ይዅን እምበር፡ ጽፍዮ-እንቋቝሖ መዓስ ከምዝካየድ ክትግምቶ ኣጸጋሚ ስለዝዀነ፡ ብኡ ምኽንያት እተን ጸገይቲ መዓልታት ክትፈልጠን እውን ኣጸገምቲ እየን።

መከላኸሊ ጥንሲ

ኣብቲ ግዜ እቲ ናይ ምጥናስ ትምኒት እንድሕር ዘይብልኪ፡ መከላኸሊ ጥንሲ ተጠቐሚ።